O alcalde de Vigo, Abel Caballero, cualificou de “desvergoña política” o trato da Xunta á cidade no relativo ás residencias de maiores e denunciou que, malia ter, segundo sostén, “a peor ratio de Galicia” en número de prazas, Vigo quedou “fóra” do anuncio realizado polo Goberno galego para construír 25 residencias con 1.800 prazas en municipios de menos de 25.000 habitantes. Nunhas declaracións remitidas aos medios, o rexedor preguntou “cantas prazas novas de residencias de maiores” vai crear a Xunta en Vigo, onde situou en 604 o número actual de prazas e onde, segundo defendeu, se concentra “a maior demanda”.

Caballero sostivo que a cidade debería contar con 3.586 prazas públicas para cumprir as ratios que atribúe á Organización Mundial da Saúde (OMS). “E a Xunta de Galicia, achaiña para arriba, con eles non vai”, criticou. O alcalde lamentou que Vigo teña, segundo a súa valoración, “a peor ratio de Galicia” en prazas de residencia e censurou tamén que a Xunta “obrigue” o Concello a achegar 350.000 euros anuais “para prazas en residencias” autonómicas. “É unha desvergoña política de Rueda”, concluíu Caballero.