O goberno de Vigo asegurou que o Concello está a incorporar novos profesionais de bombeiros ao persoal municipal polo que a cidade alcanzará no outono “o maior cadro da súa historia”. Desta maneira saíu ao paso despois de que esta semana a presidenta do PP de Vigo, Luisa Sánchez, lamentase que o goberno local “opte outro ano máis por sobrecargar con gardas extraordinarias aos bombeiros” para tentar facer fronte ao “grave problema da falta de persoal” que existe no servizo.
A líder da oposición informou de que o goberno local aprobou o pasado venres a prórroga do programa para a realización de servizos extraordinarios en exceso de xornada polo persoal do Servizo de Prevención, Extinción de Incendios e Salvamento (Speis). “É un eufemismo para dicir que así poderán facer máis gardas que as legalmente fixadas“, precisou. “Como non hai bombeiros suficientes, os que hai poden facer máis horas das permitidas. E logo, cando ocorren desgrazas, levámonos as mans á cabeza. Non é que poida ocorrer algo grave, é que xa pasou”, lembrou Sánchez.
Agora, o Concello mandou un comunicado asegurando que as gardas forman parte dunha medida de reforzo “voluntaria” para “asegurar a mellor resposta do servizo”. Tamén insiste que se están incorporando novos profesionais. “Os datos aos que fai referencia o PP non son correctos. As ofertas de emprego están actualizadas ata o ano 2022 incluído e as prazas correspondentes ás ofertas ata o ano 2025 están cubertas interinamente e en fase de formación”, asegura o goberno local. Sobre a redución do cociente mínimo por quenda por baixo dos 20 bombeiros, despois de baixalo á súa vez hai anos desde os 23 aos 20, o Concello di que os acordos “se axustan á xurisprudencia”, sen engadir ningún motivo máis.
