Obras na presa de Eiras interromperán a subministración de auga en varios concellos da área de Vigo durante gran parte deste xoves, prevéndose que os traballos se realicen entre as 08.00 e as 14.00 horas, pero estimándose que a volta á normalidade non chegará ata as 18.00 horas. Segundo informa o Consorcio de Augas do Louro, non haberá corte de subministración efectiva, xa que os municipios dispoñen de depósitos. No entanto, pediu aos veciños que extremen as medidas de aforro, sobre todo no Porriño ou en Mos, onde os depósitos son máis pequenos.
“Se as empresas e os veciños son responsables, poderemos ter auga para o esencial durante todo o día“, explicou o propio alcalde porriñés e presidente do Consorcio, Alejandro Lorenzo, que aclarou que “esta é unha obra fundamental para o abastecemento” e terá unha “gran complexidade técnica”. En concreto, estes traballos consistirán en realizar unha actuación nos condutos de saída da presa, que máis adiante permitirá o cambio definitivo das válvulas.
Tamén o Concello de Redondela alertou de “posibles complicacións” na subministración de auga polo corte da canle de Eiras anunciado por Augas de Galicia. A alcaldesa, Digna Rivas, lamentou que a notificación chegase con menos de 48 horas de antelación, xa que coincide cun período extremadamente caloroso, o que provoca un aumento do consumo de auga. Ante a falta de reserva nos depósitos, prevese que poida haber problemas nalgúns puntos nas zonas de Quintela, Río Frío, Santo Estevo de Negros e, segundo a evolución, en Cidadelle.
