Este 29 de xuño de 2026, ás 14:00 horas, fun vítima dunha agresión física e verbal no Bar Mus de Vigo. Mentres me atopaba no establecemento, fun abordado por un individuo que, de xeito violento, comezou a increparme ao berro de: “¡Ahora vete a Venezuela, comunista de mierda!”. Reiterando estas consignas de odio de forma insistente, o agresor procedeu a atacarme fisicamente, propinándome un golpe no rostro, agresión que só puido ser interrompida grazas á intervención dos clientes presentes no local.

​Como xornalista, presidente de A Esquerda de Vigo e activista comprometido coa realidade social, denuncio publicamente este ataque, o cal considero unha agresión directa non só contra a miña persoa, senón contra a convivencia democrática e o exercicio do libre pensamento. A intolerancia política non debe ter cabida na nosa sociedade; baixo ningunha circunstancia o uso da violencia debe ser tolerado como mecanismo de coacción contra quen mantemos unha postura crítica e un compromiso inquebrantable coa xustiza social e a solidariedade internacional, particularmente nestes momentos co pobo venezolano.
​Este tipo de actos non son feitos illados, senón síntomas dun clima de odio que esixe unha resposta firme e colectiva. Ante o ocorrido, manifesto o meu firme rexeitamento a calquera forma de violencia política e reitero que o meu labor como xornalista e o meu compromiso social permanecen inalterables. Os feitos foron postos en coñecemento das autoridades competentes para que se sigan as vías legais oportunas e este acto de intimidación non quede impune. Fago un chamamento á reflexión e á defensa dos dereitos fundamentais fronte a quen pretende impoñerse mediante a forza e o discurso de odio.

​Lois Pérez Leira
Presidente de A Esquerda de Vigo
Xornalista e Coordinador de Sovintern