Unha muller foi condenada pola sección Penal do Tribunal de Instancia de Vigo a pagar unha multa de 1.260 euros como autora dun delito de inxurias, tras chamar “depredador sexual” e “yonki” a un home en redes sociais. Segundo se recolle na sentenza, a acusada publicou unha mensaxe nun perfil de Instagram, creado para dar difusión a testemuños de abusos e violencia contra as mulleres. Na devandita conta, a acusada publicou unha mensaxe facendo referencia a un home ao que coñeceu e ao que se referiu como “depredador”, “enfermo”, ou “yonki”, entre outras expresións.

A xuíza considera que o contido desas expresións é “obxectivamente inxurioso” e “denotan un evidente ánimo de minguar estímaa e de denigrar á persoa á que van referidas”. Na sentenza recóllese que as palabras son “claramente atentatorias contra a súa honra e dignidade”, e que hai unha intención de inxuriar “máis aló do mero desafogo ou a crítica”, xa que se utilizou para difundir a mensaxe unha rede social, coa publicidade que iso implica. Por iso, imponlle unha multa de 1.260 euros, aínda que non acepta a petición da acusación de impor tamén unha prohibición de comunicación, “ao non apreciarse circunstancias que revelen un risco para a vítima ou unha necesidade de protección que xustifique a súa imposición”.