O alcalde de Vigo, Abel Caballero, arremeteu este mércores contra a Xunta polo peche de camas no hospital Álvaro Cunqueiro durante o período estival, así como polo peche de consultas de tarde nalgúns centros de saúde onde non se prevé substituír as vacacións dos facultativos. En declaracións remitidas aos medios, o rexedor olívico denunciou que o hospital contará con 180 camas menos no verán, 30 delas de pediatría, e que os centros de saúde de Lavadores, Navia ou Beiramar terán menos consultas de tarde.

A isto súmase, segundo o alcalde, que o PAC de Vigo “está saturado”. Tras o chamamento do conselleiro de Sanidade a facer un uso responsable das Urxencias, o rexedor cuestionou a onde vai ir a xente se ten un problema coas consultas de Atención Primaria pechadas e o punto de atención continuada colapsado.

Abel Caballero concluíu que esta situación é outra mostra máis de que a Administración autonómica “segue castigando a Vigo” cunha atención sanitaria “tan deficiente”.