A rodaxe dun documental protagonizado pola científica viguesa Begoña Vila sobre o próximo fito da exploración espacial deu comezo na NASA. Denominado ‘Rumbo ás estrelas’, relata o traballo realizado na nova misión da axencia estadounidense, onde se ultima o desenvolvemento do telescopio espacial Nancy Grace Roman, a súa próxima gran misión científica, cuxo lanzamento está previsto para setembro deste mesmo ano. O obxectivo principal deste proxecto é detectar novos planetas con posibilidade de albergar vida.

Begoña Vila, nacida na parroquia viguesa de Valladares, forma parte do equipo de enxeñeiros que desenvolveron este telescopio, o primeiro que levará nome de muller. Anteriormente, a profesional galega xa fora enxeñeira xefa de sistemas do telescopio espacial James Webb, enviado ao espazo en 2021. A través da súa figura, a película propón unha mirada persoal sobre a vocación e os sacrificios que esixen as carreiras científicas, especialmente no ámbito feminino. O filme contará coa participación de figuras relevantes da ciencia mundial como Jane Rigby, Julie McEnery ou Jamie Dunn.

A rodaxe realízase nos arredores de Washington D.C. en diversas localizacións da NASA, como o Centro de Voo Espacial Goddard de Greenbelt ou o Instituto de Ciencias do Telescopio Espacial (STScI) en Baltimore. Así mesmo, Galicia acollerá tamén parte da rodaxe coincidindo coa visita a España da protagonista para a observación da eclipse solar do 12 de agosto.