No día de onte martes sobre as 09:50 horas, Axentes da Policía Local de Vigo que patrullaban pola rúa Rosalía de Castro foron requiridos por varios viandantes, os cales informaron que na confluencia da devandita rúa con Inés Pérez de Ceta estaba a producirse unha pelexa entre varios mozos.

Unha vez no punto os Axentes observaron a un grupo de mozos discutindo acaloradamente, polo que os actuantes propuxéronse mediar. Cando se estaban achegando, viron como unha moza lanzaba un zapato a un dos mozos, impactando no rostro deste e, posteriormente, a mesma muller propináballe dúas puñadas, polo que tiveron que apartala da vítima.

Mentres procedían os actuantes á identificación da muller agresora, outros dous mozos (un home e unha muller), acometían novamente á outra parte, sen poder evitar dita agresión, mostrando ambos unha actitude arrogante e desafiante cara aos axentes.

Acto seguido identificouse á persoa agredida, resultando ser un home de 25 anos de idade, nado e domiciliado en Vigo, o cal estaba acompañado dunha moza, quen referiu que pouco antes cando paseaba coa súa parella pola rúa Inés Pérez de Ceta con dirección Rosalía de Castro, un grupo de mozas, sen mediar palabra, abalanzáronse sobre a súa parella e empezaron a agredila, polo que el tratou de protexela, momento no que outro grupo de homes se achegaron en actitude agresiva e ameazante.

A continuación fixo acto de presenza a patrulla policial, suscitándose o incidente relatado. Os agresores foron identificados e denunciados á Subdelegación do Goberno, cursándose ademais as oportunas dilixencias xudiciais.

Unha vez finalizada a intervención, os mesmos axentes foron comisionados pola Emisora Central para que se acudisen na confluencia das rúas Areal con Colón, debido a que agrediran a un mozo que presentaba lesións graves.

No lugar observaron a presenza dunha ambulancia e a un home que estaba a ser atendido polos sanitarios da mesma. A vítima manifestou aos actuantes que momentos antes cando se atopaba cun amigo na rúa Inés Pérez de Ceta observaron como un grupo de mozos se achegaba a unha moza, polo que interveu para evitar que a agredisen, e que por ese motivo recibiu puñadas e patadas, causándolle lesións no rostro, pernas e unha posible fractura na boneca do brazo dereito; polo que se ausentou do lugar para solicitar unha ambulancia.

A descrición dos mozos coincidía cos que interviñeran anteriormente, polo que ante estes feitos, tentaron sen éxito, localizar aos implicados, efectuando dilixencias xudiciais, achegándoas ás anteriores.