Axentes da Policía Nacional da Comisaría de Vigo desarticularon un punto negro de venda de drogas na contorna da Avenida da Florida, nun operativo que culminou con tres persoas detidas, e a incautación de 23 gramos de heroína, 250 gramos de cocaína, 200 gramos de haxix, un puñal de grandes dimensións, diñeiro en efectivo e outros efectos.
Segundo informaron fontes policiais, as investigacións iniciáronse no principio do ano, cando a Policía recibiu información sobre un individuo residente na zona de Coruxo que se estaba dedicando presuntamente ao tráfico de drogas. De forma paralela, o mesmo grupo estaba a investigar unha casa okupada situada nas inmediacións da Avenida da Florida, que funcionaba como punto de venda e consumo de estupefacientes e que xeraba alarma entre os veciños pola incidencia de altercados.
As pescudas permitiron comprobar que o sospeitoso de Coruxo era o principal provedor de drogas desa casa okupada. Á primeira hora da mañá deste xoves axentes do Grupo Operativo Especial de Seguridade (GOES) da Xefatura Superior da Coruña e axentes da Unidade de Prevención e Reacción (UPR) da Comisaría de Vigo-Redondela procederon á entrada simultanea nos dous puntos.
Na vivenda da zona da Florida foron detidos os dous principais investigados e identificouse a outras cinco persoas que estaban a pasar a noite na casa. En Coruxo, detívose a unha terceira persoa, como presunto provedor da droga. Na primeira das localizacións interviñéronse 23 gramos de heroína (15 gramos xuntos e 8 divididos en monodosis), 250 gramos de cocaína, un puñal de 20 centímetros de folla, diversas básculas de precisión e útiles para o corte e distribución da droga. Así mesmo, interveuse un vehículo que se utilizaban para ocultar a droga.
Por outra banda, no domicilio de Coruxo interviñéronse 200 gramos de haxix, un inhibidor de frecuencias, 2.300 euros en efectivo e dous vehículos utilizados para o transporte das sustancias. Os detidos e os efectos intervidos foron postos a disposición do tribunal de instancia de Vigo, sección de instrución praza 4 de Vigo.
