O expresidente de Cantabria e secretario xeral do Partido Rexionalista de Cantabria, Miguel Ángel Revilla, será o pregoeiro da XXXIX Festa do Choco de Redondela, segundo informou a alcaldesa, Digna Rivas, nun audio enviado aos medios de comunicación. A rexedora mostrouse “especialmente satisfeita” desta “gran noticia” e agradeceu a Revilla que aceptase a invitación, xa que permitirá que a festa teña unha “repercusión nacional sen precedentes”.
Rivas puxo en valor a Revilla como un “embaixador da gastronomía e dos produtos do mar” e animou toda a cidadanía a escoitalo antes do inicio da festa. Así, reivindicou o expresidente cántabro como un “referente” en políticas sociais, cun discurso “marcado pola igualdade”. Digna Rivas pechou o audio subliñando que o seu goberno xa traballa na organización da XXXIX Festa do Choco, que se celebrará entre os días 8 e 10 de maio.
