Médicos de Vigo agardan que o conselleiro de Sanidade, Antonio Gómez Caamaño, “sente a negociar de verdade” tras oito días de peche no CIS Olimpia Valencia e ante o inicio da cuarta semana de folga na Atención Primaria. Así o sinalou a facultativa Maite Espantoso durante a concentración convocada por O’Mega esta mañá ante as portas do centro de saúde vigués. A protesta coincidiu co arranque da reunión en Santiago entre a Xunta e o sindicato para tratar de desbloquear o conflito.

A facultativa reivindicou que o único que piden é “traballar dignamente”, para o que consideran imprescindible limitar a 30 os pacientes diarios con 10 minutos por consulta. Espantoso criticou que, na actualidade, os médicos de Primaria atenden entre 45 e 60 persoas por xornada, chegando a rexistrarse picos de ata 101 pacientes en zonas como Cangas durante os días de folga. Por iso, insistiu na “sobrecarga asistencial” que sofren, realizando horas extra non remuneradas e omitindo os seus descansos. “Coidamos á xente, gústanos facelo ben”, reprochou.

80.000 CONSULTAS CANCELADAS

Segundo as estimacións do colectivo, en Galicia cancélanse unhas 5.000 consultas ao día, acumulando xa case 80.000 desde o inicio do paro. Á concentración de hoxe acudiu o alcalde de Vigo, Abel Caballero, quen anunciou que o Concello organizará un concerto de apoio aos médicos de Atención Primaria. Este evento celebrarase na Porta do Sol nunha data aínda por determinar, coincidindo co marco dos actos da Festa da Reconquista.