O Instituto Español de Oceanografía (IEO-CSIC) e a Asociación de Marisqueo á boia Ría de Vigo puxeron en marcha o proxecto ‘Volaria’. Esta iniciativa busca recuperar a comercialización da volandeira na ría viguesa, unha especie que leva anos sen poder extraerse por presentar concentracións de chumbo superiores ao límite legal. O problema débese a unha particularidade fisiolóxica deste bivalvo e á persistencia de contaminación industrial antiga no interior da ría.
Para dar unha solución, os científicos estudarán os factores biolóxicos e físico-químicos que inflúen nesta bioacumulación. Este luns iniciáronse as mostraxes, que se realizarán mensualmente durante un ano. En febreiro farase un estudo por tallas e en maio analizaranse os sedimentos mediante o uso de isótopos estables para dilucidar a orixe exacta do metal. Ademais, xa se instalaron sensores acumuladores de metais en bateas para controlar a variación do chumbo na auga durante todo o exercicio.
ACUMULACIÓN DE CONTAMINANTES EMERXENTES
Doutra banda, a expedición científica europea ‘One Blue Atlantic’ iniciou este martes en Vigo unha campaña para avaliar a presenza de contaminantes de preocupación emerxente (CECs) no medio mariño. Unha quincena de investigadores, liderados por Montse Salas (ICM-CSIC), percorrerán a ruta atlántica ata Málaga a bordo do buque Sarmiento de Gamboa. O obxectivo é cartografar estes contaminantes e microplásticos en augas profundas, de ata 5.000 metros, e analizar o seu impacto na saúde humana e nos microorganismos mariños.
CONVENIO LURA XIGANTE
Noutra orde de asuntos, ANFACO-CECOMS e o comité CALAMASUR subscribiron un convenio de colaboración para promover a sustentabilidade da lura xigante no Pacífico Sur. Este recurso, un dos máis abundantes do mundo con desembarcos de ata 1,7 millóns de toneladas, é clave para o mercado global. O acordo, asinado por Roberto Alonso e Alfonso Miranda, busca impulsar medidas de xestión efectivas que se analizarán a vindeira semana nunha reunión internacional en Panamá.
