O grupo municipal do BNG en Vigo pediu a retirada da proposta do V Plan de Igualdade de Oportunidades entre Mulleres e Homes presentado polo goberno local, denunciando que o documento non foi sometido a debate no Consello Municipal da Muller. A concelleira nacionalista Ana Martínez advertiu de que este plan “chega con 14 anos de atraso“, dado que o anterior venceu no ano 2012, e criticou que o texto actual “non foi presentado, nin consensuado, nin ditaminado” polo órgano de participación correspondente.
Desde o BNG subliñaron que un proxecto desta natureza “debería contar co máximo consenso e participación social”. Porén, sinalaron que a día de hoxe as integrantes do Consello Municipal descoñecen o seu contido, ao igual que o propio grupo municipal nacionalista. “Queremos que sexa un plan de cidade, non só un plan do goberno municipal“, reivindicou Martínez, quen lamentou que o executivo de Abel Caballero “goberna de costas á cidadanía”.
A formación nacionalista recalcou que a igualdade require dunha “planificación rigorosa, avaliación transparente e implicación real do tecido social“, polo que defenderon que o plan non pode quedar reducido a un simple trámite formal sen diálogo previo. Para o BNG vigués, a falta de consenso deslexitima un documento que debería ser a folla de ruta para as políticas de xénero na cidade durante os vindeiros anos.
