O grupo municipal do BNG no Concello de Vigo esixiu este xoves ao alcalde, Abel Caballero, que rexeite o acordo entre a FEGAMP e a Xunta para o financiamento do Servizo de Axuda no Fogar (SAF), que cualifican como “tomadura de pelo“. O portavoz nacionalista, Xabier Pérez Igrexas, lembrou que o custo do servizo en Vigo é superior aos 24 euros por hora, dos que o Concello paga a metade, a pesar de non ser “a administración competente”.
Neste contexto, denunciou que o acordo é “un engano” e unha “tomadura de pelo”, porque se limita a aumentar a achega da Xunta a 16 euros/hora en 2026, 17 euros en 2027 e 18 euros en 2028. “Mesmo no mellor dos escenarios, a contía quedaría moi lonxe do custo real do servizo, obrigando ao Concello a seguir asumindo un sobrecusto inxusto”, subliñou Pérez Igrexas. O SAF de Vigo atende actualmente a máis de 1.600 persoas, e case 2.000 seguen en lista de espera. Ademais, as condicións das 600 traballadoras están “marcadas pola precariedade e os baixos salarios”, a pesar de que representan a “columna vertebral” dun sistema público de coidados “claramente insuficiente”.
Para o BNG, o aval da FEGAMP ao acordo foi “unha grave equivocación”, porque se “normaliza o financiamento á baixa”, e advertiu de que “sería aínda máis grave que o goberno de Vigo aceptáseo calado”. Por iso, no próximo pleno os nacionalistas interpelarán ao goberno vigués sobre esta cuestión, para saber que posición adoptará e advertiu de que “a única resposta responsable” é o rexeitamento ao acordo. O BNG expón que a Xunta pague de inmediato 17 euros/hora, con carácter retroactivo desde xaneiro de 2025, e que aumente o financiamento ata os 20 euros neste 2026, ata asumir o 100 por 100 do custo ao final dos mandatos municipais en 2027.
