O Tribunal Superior de Xustiza de Galicia (TSXG) confirmou a pena de ano e medio de cárcere imposto pola sección quinta da Audiencia Provincial de Pontevedra, con sede en Vigo, para un home por estafar a dúas persoas con falsos alugueres de pisos na cidade olívica. En concreto, a Sala do Civil e Penal do TSXG desestimou o recurso de apelación presentado polo home, tras ser condenado por un delito continuado de estafa agravada a 18 meses de prisión e unha multa de 1.260 euros, ademais de máis de 2.000 euros de indemnización ás vítimas.
Considérase probado que o procesado contactou cunha muller en febreiro de 2024, sabendo que ela estaba a buscar unha vivenda en Vigo, e ofreceulle o aluguer dun piso por 600 euros mensuais. A vítima aceptou e ingresoulle 600 euros en concepto de reserva, xa que a vivenda estaba a ser supostamente reformada e non podería ocupala ata o mes seguinte.
Cando chegou o momento, o acusado puxo escusas para que a muller non puidese acceder ao piso e pediulle outros 600 euros co pretexto de que tiña que inscribir a vivenda nun rexistro de alugueres da Xunta. Pouco despois solicitoulle outros 220 euros para un seguro de aluguer, pero a vítima nunca puido acceder ao piso nin recuperou o diñeiro. Ademais, o home estafou tamén a outra persoa, que lle ingresou ata 700 euros.
