Vigo acenderá este sábado as luces de Nadal ás 20.00 horas baixo a árbore xigante da Porta do Sol, un acto ao que só poderán acceder 7.000 persoas a través das rúas Príncipe, Policarpo Sanz, Carral e Doutor Cadaval. O alcalde, Abel Caballero, explicou que haberá tres pantallas xigantes —en Policarpo Sanz, o Museo Marco e Vialia— para seguir en directo o comezo oficial das festas, confiando en que a choiva dea unha tregua.
A árbore, de 45 metros, soará este ano con temas como Happy Xmas de John Lennon, All I Want for Christmas Is You de Mariah Carey, Chegou o Nadal de Ozuna, ademais de pezas de Elton John, Sting e Shostakovich. O rexedor confirmou tamén a apertura do Cíes Market este sábado, mentres que o resto de mercadillos, incluídos os novos de Bouzas e Vialia, irán abrindo nos vindeiros días.
A cidade contará con case 12 millóns de luces LED en 460 rúas e prazas, con máis de 7.000 elementos ornamentais e unha ampla oferta que inclúe o Belén Monumental, a Casa de Papá Noel, a nora xigante e numerosos elementos lumínicos en 3D.
Os hoteleiros celebran o inicio da campaña, que arrinca cun 80% de ocupación nos establecementos do centro. O presidente de Ahosvi, Daniele Provezza, augura unha tempada “moi boa”, con hoteis “case completos” para a ponte de decembro e un forte incremento nas reservas das ceas de Nadal. Sinala, ademais, que moitos grupos están a adiantar as celebracións a novembro, o que contribúe a desestacionalizar e mellorar a calidade do emprego. Asegura que, aínda que o centro é o máis beneficiado, o efecto das luces xa se nota en toda a cidade.
