O presidente da Xunta, Alberto Núñez Feijóo, volve a insistir nas súas críticas ao rexedor de Vigo, Abel Caballero, por priorizar os gastos en luces de Nadal e non en erradicar a pobreza nunha cidade, que dixo, “ten os maiores problemas sociais de Galicia”.
“Asombra que o mesmo grupo que di que hai un problema de pobreza en Galicia priorice este tipo de investimentos suntuarios –luces– para maior honra e brillantez de determinados políticos”, dixo Feijóo en alusión a Caballero. Unhas declaración que fixo na rolda de prensa posterior ao Consello da Xunta logo de que Xornal de Vigo lle preguntara pola “politización” do alumeado de Nadal que o seu partido está a facer en Vigo, Santiago ou Lugo, e as súas críticas o pasado mércores na Cámara galega, cando hai outros graves problemas na sociedade galega.
Na Cámara galega Feijóo comparou a Vigo con Venezuela e criticou ao seu alcalde por ir mercar as luces de Nadal da Andalucía en vez de facelo en Galicia. “Eu dixen o que dixen no Parlamento e non vexo ao PSOE moi preocupado pola pobreza ou os problemas sociais”, contestou.
“CIDADE CON MÁIS PROBLEMAS SOCIAIS”
“Sorprendeume que a cidade con máis problemas sociais que hai en Galicia que é Vigo priorice determinadas compras navideñas e descuide, na miña opinión, una política social que debería ter un concello que ten milóns e millóns de euros de excedentes orzamentarios”, engadiu.
Con todo, non quixo referirse as críticas realizadas polo seu partido en Santiago ou Lugo que teñen criticado a Compostela Aberta e ao PSdeG, respectivamente, polos problemas no alumeado de Nadal destas cidades. “Eu non me meto nas luces doutras ciudades das outras cidades, nin das de Vigo, porque iso non é a miña prioridade”, indicou. Con todo, volveu aproveitar para atacar ao rexedor olívico e dixo que, a diferencia das prioridades de Caballero, as súas prioridades “son as políticas sociais e sanitarias”.
