Esquerda Unida de Vigo mostrou o seu apoio á solicitude de Sumar para que o aeroporto de Peinador sexa declarado Lugar de Memoria Democrática, ao considerar que representa “un testemuño material da represión franquista”.

A formación lembra que o aeródromo, inaugurado en 1954, tivo a súa orixe no traballo forzoso imposto por edicto en 1936, que obrigaba a veciños de Vigo, Lavadores e Mos a realizar dous días mensuais de obras de explanación ou pagar seis pesetas por xornada.

O coordinador local de EU, Guillermo Crego, subliñou que “sinalizar e explicar o orixe de Peinador é un deber democrático”. O grupo propón que o Goberno inicie o expediente, coordine actuacións con AENA, Xunta e concellos afectados, e instale paneis interpretativos e un espazo de homenaxe. Ademais, reclama un programa educativo anual e un acto de recordo cada 17 de setembro. EU tamén criticou ao goberno local por manter símbolos sen contextualizar, como a Cruz dos Caídos do monte do Castro.