A Sala do Civil e Penal do TSXG vén de confirmar a condena de sete anos de cárcere que a sección quinta da Audiencia Provincial de Pontevedra lle impuxo a un veciño de Vigo por traficar con droga e tentar apuñalar a un consumidor que lle pagou dez céntimos menos dos 30 euros por medio gramo de heroína. A vítima logrou evitar que lle cravase a arma, pero resultou lesionada durante a pelexa para tratar de arrebatarlla.

Os maxistrados desestimaron o recurso de apelación presentado pola defensa porque consideran que a sentenza de primeira instancia está “fundada en suficiente proba de cargo”.

Ademais, o tribunal indica que o acusado ofreceu versións “ contraditorias” e “incompatibles” coas lesións que presentaba a vítima. O TSXG tampouco deu crédito a que as substancias estupefacientes comisadas na súa vivenda fosen para autoconsumo.