A sección sexta da Audiencia Provincial de Pontevedra, con sede en Vigo, condenou a unha empresa de limpeza e á súa compañía aseguradora a indemnizar en algo máis de 12.000 euros a un veciño dun inmoble da cidade que escorregou e sufriu unha caída nunha escaleira mollada, que non estaba sinalizada.
Os feitos producíronse en setembro de 2022, cando este veciño escorregou nas escaleiras, que estaban molladas porque unha empregada da empresa de limpeza acababa de fregalas. O prexudicado presentou unha reclamación polos danos e prexuízos que lle produciu a caída, pero o Xulgado de Primeira Instancia 14 de Vigo ditou sentenza desestimando a súa demanda. Ante esta resolución, o veciño presentou recurso de apelación e agora a Audiencia Provincial estimou en parte as súas pretensións, nunha sentenza de maio pasado.
O Tribunal provincial sinala que, aínda que a limpeza dun edificio non pode considerarse unha actividade perigosa ou de risco, o certo é que o recorrente sufriu unha caída, e non se puido determinar que a limpadora advertise de que estaba a realizar ese labor. “A ausencia de todo indicio que indique o labor que se estaba ou se acababa de realizar permite entender que non se pode trasladar aos veciños que tomen maiores precaucións que as lóxicas do deambular polas escaleiras do portal onde residen”, sinala a Audiencia.
Por iso, acordou estimar en parte o recurso e condena á empresa e á súa compañía aseguradora a indemnizar solidariamente ao prexudicado en 12.192,51 euros máis intereses polos danos e prexuízos sufridos (tivo unha luxación acromio-clavicular, e debeu someterse a rehabilitación).
