O alcalde de Vigo, Abel Caballero, confirmou este xoves que solicitou á Xunta de Galicia a reversión do antigo edificio do colexio Virxe do Rocío, onde a Xunta instalou en setembro de 2023 o Centro de Formación e Recursos para o Profesorado (CFRP). En declaracións remitidas aos medios, o rexedor olívico lembrou que ese edificio “é municipal” e dado que o CEIP está noutras instalacións máis novas, o inmoble reclamado está “desde hai anos sen utilización docente”.
“É noso, é da cidade e a Xunta quere quedar con el, pero non pode porque, se xa non é colexio, ese edificio ten que reverter ao seu propietario”, proclamou Caballero, que engadiu que “a Xunta é moi dada a quedar con propiedades do Concello e da cidade de Vigo”. Tras criticar que o goberno galego “escatima os investimentos”, advertiu de que, se quere un centro para o profesorado, “ten que construír un edificio”. “Que constrúa un edificio e que o dedique a centro de profesorado, e terá todo o noso apoio. Pero queremos o colexio do Rocío porque queremos que sexa un lugar social e de atención para toda a cidade”, sentenciou.
O CFRP do Virxe do Rocío foi inaugurado en setembro de 2023 polo conselleiro de Educación, Román Rodríguez, tras un investimento de 400.000 euros para a súa reforma e adecuación. As instalacións contan con 3.000 metros cadrados distribuídos en tres plantas, e dispoñen dunha réplica dunha aula E-Dixgal e un Polo Creativo, dotados con todo o equipamento; tamén dispón dun salón de actos con capacidade para 100 persoas e 6 aulas de formación que suman unha capacidade máxima de 400 persoas, ao que se engaden espazos de administración e despachos.
Esta decisión municipal prodúcese no medio doutra polémica relativa a un inmoble, o dos antigos xulgados da rúa Lalín. Nese edificio a Xunta proxecta a construción dun centro de asociacionismo, cun investimento de máis de 20 millóns de euros, pero as obras non puideron comezar porque o Concello, tras outorgar a licenza en novembro do ano pasado, revogouna dous meses despois alegando que o inmoble é de titularidade municipal e que o goberno local queren facer un centro social para veciños da zona. A Xunta, por contra, defende que é titular do edificio, aínda que tivo que resolver o contrat coa empresa que ía facer a reforma, xa que hai comprometidos fondos europeos e non se sabe se se poderá levar a cabo ou cando o proxecto. Con todo, o goberno autonómico sinalou que acudirá á vía xudicial para defender a súa posición neste conflito.
“DESAFIUZAMENTO EDUCATIVO”
A Consellería de Educación, ante o anuncio de Caballero de reclamar a reversión do edificio, sinalou que “o CEIP Virxe do Rocío segue sendo un colexio”, e lembrou que nese edificio “fórmanse cada ano 9.000 profesores”. “É o seu fogar. Se Caballero pretende botar da súa casa ao profesorado de Vigo, a Xunta non o vai a permitir. Por tanto se pretende facer un desafiuzamento educativo, dicímoslle que non”, sinalaron fontes do departamento autonómico. As mesmas fontes lembraron ese recente investimento de 400.000 euros para adecuar as instalacións do CFRP, e lembraron que a actividade de formación de docentes que alí se realiza “repercute moi positivamente na educación que reciben os nenos e nenas de Vigo”.
