A doutora Margarita Estévez Iglesias foi nomeada nova directora de Atención Primaria da área Sanitaria de Vigo, substituíndo no cargo ao doutor Roberto Devesa. Nun comunicado, o Servizo Galego de Saúde (Sergas) indica que Estévez é licenciada en Medicina e Cirurxía pola Universidade de Santiago de Compostela e nos últimos anos desenvolveu as súas funcións como médica de Familia no Centro de Saúde de López Mora, en Vigo. Antes, tras especializarse en Medicina Familiar e Comunitaria, exerceu en distintos centros de saúde. Ademais, como docente, exerceu como titora do programa de formación MIR de Medicina de Familia e Comunitaria, tanto en urxencias extrahospitalarias como en atención ordinaria, na área Sanitaria de Pontevedra-O Salnés.