O xulgado de instrución 4 de Vigo admitiu a trámite unha querela presentada pola Fiscalía, e investiga a posible comisión dun delito ambiental vinculado a uns movementos de terras no nacemento do río Lagares.

Segundo confirmaron fontes xudiciais, no marco deste procedemento están investigadas tres persoas, o presidente dos comuneiros de Cabral, un construtor vinculado a este e un cidadán romanés.

Con todo, ningún deles foi citado a declarar aínda, xa que o xuíz solicitou un informe técnico á Xunta de Galicia sobre os feitos denunciados pola Fiscalía, e esperará a dispor deste informe antes de escoitar aos investigados.

Precisamente, a Dirección Xeral de Patrimonio Natural incoou un expediente sancionador contra a Comunidade de Montes de Cabral por esas obras executadas no nacemento do río Lagares. A proposta de sanción é de 98.500 euros.

As obras foron denunciadas pola Asociación de Veciños e Empresarios de Cabral (Aveeca) en outubro do ano pasado e o Seprona da Garda Civil tamén puxera os feitos en coñecemento da Xunta.

Así, abriuse un expediente relativo ao proxecto dos comuneiros de “obras de recuperación de terreo, construción de muros de contención cun novo paso, mellora de presa e ampliación de paso existente no Aero Club de Vigo”.

Augas de Galicia advertiu de que devandito proxecto “obvia as afeccións sobre o patrimonio natural” e, avanzados os traballos, o Seprona confirmou que se trataba de “obras moi agresivas” sobre o río, augas arriba da zona da Lagoa de Mol, onde se solicitaba a autorización. Así mesmo, a Garda Civil confirmou que se desviou a canle do río cunha máquina escavadora e que se arrincaron numerosos pés de árbores de ribeira, nun tramo duns 250 metros.