A delegada territorial da Xunta en Vigo, Ana Ortiz, presentou este mércores a terceira edición do festival Iacobus Maris Experience, que se celebrará na cidade olívica entre o 24 e o 28 de xullo.

Tal como indicou Ortiz, este evento converterá a Vigo nunha gran festa marítima durante cinco días, tras a “gran acollida” do festival dos grandes veleiros en 2022 e 2023.

En concreto, a Fundación Traslatio, co patrocinio da Xunta e a colaboración do Porto de Vigo, organizará numerosas actividades e talleres, acompañados por un espazo gastronómico de cociña do mar e música en directo para todos os públicos.

O festival, que levará a cabo na dársena da Laxe, contará con actividades para nenos e maiores, xogos infantís, casetas de comida e bebida, concertos e visitas guiadas. Ademais, serán varios os buques que participen no evento.

“É para min unha honra presentar hoxe un espectáculo único que a cidade non vivía desde hai moitos anos e que grazas á implicación da Xunta podemos gozar de novo”, indicou Ortiz, segundo recolle o Goberno galego nun comunicado.