O Concello de Vigo remitiu este xoves un comunicado aos medios no que asegura que a paralización da talla prevista no noiro da rúa Falperra foi unha decisión dos técnicos de Parques e Xardíns, e non consecuencia da presión dos veciños, que se concentraron na zona para evitar a actuación.

Segundo fontes municipais, os técnicos acudiron á zona “para comprobar o estado da masa arbórea” e “unha vez alí, tomaron a decisión de manter temporalmente os exemplares nese espazo ante a posibilidade de que existan niños de aves, ao estar no período natural de nidificación”.

Por tanto, insistiron desde o goberno municipal, “é completamente falso que os veciños ou o Seprona paralizasen esta actuación, senón que foi unha decisión dos técnicos municipais”.

Así mesmo, o Concello lembrou que “existen informes previos” que recomendan a eliminación de especies invasoras que axudan a propagar o lume e pon en risco a seguridade, como é o caso das acacias negras que hai no noiro de Falperra. “En todo caso, o Concello xa solicitou un novo informe que certifique a situación actual desa masa arbórea”, conclúe o comunicado.

Con todo, a actuación dos operarios municipais nese noiro xa fora avanzada polo Concello, que alegou esas razóns de seguridade. De feito, a Policía Local cortou o tráfico nesa rúa na mañá deste xoves e na zona había valos con letreiros que advertían do corte para proceder a labores de talla e poda, segundo confirmaron testemuñas a Europa Press.