Axentes da Policía Local detiveron o pasado fin de semana a unha moza de 19 anos de idade, A.O.R., como presunta autora dun delito de lesións, tras golpear á camareira dun local de lecer na cara cun vaso.
Segundo informaron fontes policiais, os feitos ocorreron na madrugada do pasado domingo, cando o 092 recibiu unha chamada para acudir a un local da rúa Inés Pérez de Ceta, por unha suposta agresión a unha traballadora.
Unha vez alí, os axentes entrevistáronse con testemuñas e coa prexudicada, que relatou que unha moza se achegou a pedirlle unha folla de reclamacións e que, sen motivo algún, comezou a agredila, colléndoa polo pelo e tentando sacala por encima da barra.
Así mesmo, explicou que a moza lle lanzou un vaso contra a cara, causándolle un corte profundo na cella esquerda, e engadiu que outro tres mulleres que acompañaban á moza sumáronse á agresión dándolle golpes na cara e na cabeza. A muller ferida tivo que ser trasladada en ambulancia ao hospital Álvaro Cunqueiro.
Os policías entrevistáronse coa sospeitosa, que de maneira voluntaria e libre manifestou que, momentos antes, a camareira déralle unhas losqueadas na fazula e que ela respondera rompéndolle un vaso na cara.
