A Consellería de Cultura, Educación, FP e Universidades concede axudas de 6.000 euros a 83 centros privados concertados galegos para a contratación, leste mesmo curso 2023/24, de auxiliares de conversación en linguas estranxeiras.

Así o recolle unha resolución asinada pola directora xeral de Ordenación e Innovación Educativa, Judith Fernández, e publicada no portal educativo da Xunta coa relación de 83 colexios que reciben esta subvención. En total, a contía desembolsada ascende a 498.000 euros.

A listaxe de centros beneficiarios e excluídos –outros 11– é provisional, polo que aínda se poderán efectuar reclamacións ou renuncias no prazo de 10 días hábiles.

Estes auxiliares de conversación súmanse aos 655 que ao longo do presente curso prestan apoio en máis de 800 centros da rede pública.

CONCURSO DE TRASLADOS

Por outra banda, o Diario Oficial de Galicia (DOG) publicou este xoves a relación definitiva que resolve o concurso de traslados para cubrir o próximo curso un total de 50 prazas en centros públicos que imparten ensinos de persoas adultas.

En concreto, esta convocatoria está destinada a persoal docente funcionario de carreira de Secundaria, así como do corpo de catedráticos de Secundaria e de mestres de Primaria. Tamén para profesores en prácticas.

Os 50 seleccionados deberán tomar posesión do seu novo destino a partir do 1 de setembro.