A delegada territorial da Xunta en Vigo, Ana Ortiz, urxiu este xoves ao alcalde da cidade, Abel Caballero, que asine o convenio para poder iniciar a construción do instituto de Navia, catro meses despois de que o rexedor anunciase que si o faría.
Tras ser preguntada por como avanza o estado da tramitación das devanditas obras, Ortiz explicou que, polo momento, “non hai novidade”, xa que o goberno local non rubricou o documento. “Estamos a esperar”, lamentou.
Todo iso catro meses despois de que Abel Caballero confirmase que, tras recibir unha nova proposta de convenio por parte do Goberno galego, estaba disposto a asinar o acordo para a construción do IES de Navia, despois de tres anos de disputa entre ambas as administracións por esta infraestrutura. Con todo, ata a data non se produciu esta firma.
A delegada dixo aos medios de comunicación que o proxecto xa está licitado e adxudicado. Nel investíronse xa uns 400.000 euros, con 14 millóns de euros pendentes para a realización da obra, lembrou.
Estas palabras realizounas nunha visita precisamente ao barrio de Navia, onde anunciou que a Dirección Xeral de Patrimonio Cultural xa comunicou ao Concello de Vigo o seu visto e prace para o proxecto da urbanización do Polígono 3 do plan parcial de San Paio de Navia.
“Os traballos de urbanización do Polígono 1 para pór a disposición dos vigueses un total de 201 vivendas de promoción pública marchan a bo ritmo, pero ademais xa hai autorización para urbanizar un novo polígono”, sinalou Ortiz.
