Os servizos de emerxencias desprazáronse na tarde deste xoves á rúa Sanjurjo Badía de Vigo tras rexistrarse lume nunha casa.

Segundo fontes do 112 Galicia, foi o persoal de Urxencias Sanitarias o que alertou sobre as 18.00 horas ao Centro Integrado de Atención ás Emerxencias para avisar de que se estaba producindo un incendio á altura do número 214 desa vía.

Por iso, deuse aviso aos Bombeiros de Vigo, que se achegaron ao momento para sufocar as chamas. A esta hora, os profesionais continúan no lugar ventilando a vivenda.

As mesmas fontes explicaron que só hai que lamentar danos materiais, xa que os moradores do domicilio puideran saír do mesmo.