O alcalde de Vigo e presidente do padroado da Fundación Museo Marco, Abel Caballero, puxo en valor o traballo de Miguel Fernández Cid á fronte da sala expositiva, reivindicándoo como “o mellor director da historia”, polo que garantiu a súa renovación en marzo.

Nun audio enviado aos medios de comunicación, o rexedor olívico adiantou que na reunión desta tarde do padroado tomarán posesión novos membros. Entre eles, a tenente de alcalde, Carmela Silva, será a nova vicepresidenta, para dar “continuidade” ao funcionamento do organismo.

Para Caballero, o Marco é a “crónica dun éxito anunciado”, grazas ao “traballo excepcional” de Fernández Cid, polo que garantiu a súa renovación, que tocará en marzo. “É un gran director. Sen dúbida, o mellor que tivo o Marco en toda a súa historia”, sentenciou.