Un intenso chuvieiro rexistrado en Vigo ao mediodía deste xoves causou inundacións en varias zonas do centro da cidade, tras acumularse cantidades de choiva que superaron os 10 litros por metro cadrado en apenas uns minutos.

A tromba de auga ‘caeu’ sobre as 13,00 horas, provocando a creación de ‘balsas’ en zonas como Julián Estévez (onde son habituais as inundacións cando hai precipitacións intensas) ou Isaac Peral. Así mesmo, rexistrouse a entrada de auga en garaxes e aparcadoiros, como o estacionamento do complexo Vialia.

A acumulación de auga fixo saltar algunhas tapas de rexistro pero os bombeiros confirmaron que non tiveron que intervir en ningún incidente.