O salario máis alto das principais alcaldías galegas percíbeo o alcalde de Vigo, Abel Caballero, que cobrou 74.018,18 euros en 2017. Por outra banda, o peor pagado das grandes cidades foi o alcalde coruñés, Xulio Ferreiro, que percibiu pouco máis da metade, 39.999,96 euros.

Estes datos foron aportados polo Goberno central de Pedro Sánchez, quen non contou co exercicio de transparencia de aportar as contas en varios municipios. En total, 43 dos 313 concellos que hai en Galicia non enviaron datos, entre eles o concello de Ourense ou o de Ferrol.

O segundo mellor pagado das sete principais cidades galegas foi o alcalde de Pontevedra, Miguel Anxo Fernández Lores (BNG), que cobrou só 3.000 menos que o alcalde vigués en 2017. Despois segue na lista a alcaldesa de Lugo, do PSOE, con 67.021,08 euros. O alcalde de Santiago, Martiño Noriega, quedou en 50.999, 90 euros.

En canto ás deputacións provinciais, Carmela Silva (PSOE), a cargo da Deputación de Pontevedra, percibiu 73.032,26 euros, situándose á cabeza, mais seguida de cerca polo presidente da Deputación ourensá, Manuel Baltar (PP), con 72.325,26 euros.

Pola súa banda, o presidente da Deputación da Coruña, Valentín González Formoso (PSOE), e o de Lugo, Darío Campos (tamén do PSOE), percibiron 64.778,84 euros.