Axentes da Policía Local de Vigo detiveron a un mozo de 20 anos de idade, S.B.C., como presunto autor dun delito de quebrantamento de medida, tras retirarse unha pulseira telemática de seguimento e confesar que o fixo porque se dispuña a roubar nun establecemento e non quería ser localizado.

Os feitos ocorreron na madrugada do domingo, cando unha patrulla acudiu á rúa Ecuador tras recibir un aviso dun veciño que estaba a observar a un home sentado nun banco na rúa, portando un coitelo. Cando chegaron os axentes, localizaron a este mozo e, ao preguntarlle se levaba un coitelo, este negouno. Con todo os axentes, atoparon a arma tirada nas inmediacións.

Ao volver insistir, o mozo recoñeceu que o coitelo era seu, e que o levaba “para cobrar débedas”. Ao comprobar os seus datos, os axentes constataron que este home tiña que levar unha pulseira telemática obrigatoriamente, por orde do xulgado de Violencia sobre a Muller. Entón, el admitiu que a quitou deliberadamente porque se dispuña a roubar nun establecemento próximo e non quería que se lle localizase.