A Agrupación de Electores de Redondela (AER), formación que obtivo un edil nas pasadas eleccións de maio e que asinou un acordo coa candidata socialista, Digna Rivas, para apoiar a súa investidura e entrar o goberno local, denunciou este venres que a rexedora “non está a cumprir” dito acordo.

Así, catro meses despois da investidura, e despois de que se asinase un acordo ante notario que incluía unha posible sanción de 100.000 euros á alcaldesa en caso de incumprimento, AER criticou que hai puntos do pacto que non se están levando a cabo e que mesmo algún “xa son imposibles”.

Entre os acordos, a Agrupación de Electores destacou o compromiso de reorientar o aparcadoiro de Vilavella con criterios ambientais. Respecto diso, explicaron que unha das condicións para apoiar a investidura de Rivas foi reorientar o proxecto para recuperar a ribeira natural do río Maceiras nese tramo, pero o estado actual dos traballos evidencia que a alcaldesa “non cambiou nin unha coma” do seu proxecto orixinal.

Por outra banda, tamén constataron que Digna Rivas “non fixo absolutamente nada” par avanzar na peonalización das rúas Pai Sarmiento, Paseo da Xunqueira e a contorna da Praza da Constitución.

Na mesma liña, denunciaron que tampouco se cumpre o acordo no relativo á xestión de emerxencias, porque non se dotou ao servizo municipal de máis recursos, nin hai contactos co Concello de Vigo para que os bombeiros da cidade poidan dar cobertura a emerxencias vitais en Redondela.