Axentes da Policía Nacional detiveron a tres persoas, supostos membros dunha organización criminal dedicada a cometer estafas por internet, nun operativo iniciado por mor dunha denuncia interposta na comisaría de Vigo. As investigacións iniciáronse a partir desa denuncia, por parte dunha persoa que fora vítima dunha estafa en compra-venda dun teléfono móbil a través dunha páxina de Internet.

A Policía detectou denuncias por feitos similares en diferentes localidades españolas, todas elas relacionadas con diferentes páxinas web, e ascendendo o total do defraudado a máis dun millón de euros, que estaban repartidos en varias contas bancarias.

Coa colaboración de axentes da Comisaría de Maspalomas (Gran Canaria), a Policía puido identificar as persoas que estaban detrás desas estafas e comprobaron que se trataba dunha organización criminal que se dedicaba a ofrecer produtos electrónicos a través de distintas páxinas de Internet, simulando compravendas de produtos que nunca chegaban aos seus destinatarios, pero polos cales cobraban igualmente.

Este grupo actuaba por toda a xeografía española, e deran de alta distintas empresas, ás que asociaban diferentes contas bancarias para as transferencias de compra e venda de produtos. Deste xeito, acreditábase unha relación comercial entre as empresas e os compradores, e utilizaban contas no estranxeiro e sociedades interpostas para non ser descubertos.

A Policía puido esclarecer máis de 50 estafas e atribúe aos investigados (que foron detidos en Maspalomas) pertenza a un grupo criminal, estafa continuada e branqueo de capitais. A investigación continúa aberta e non se descartan novas detencións, xa que ao situarse no estranxeiro moitas das contas bancarias, non se descarta que haxa vítimas fóra de España.