O lume no edificio que este mércores provocou catro mortes (unha muller e tres menores) produciuse nun coñecido edificio que está ocupado dende hai unha década por indixentes e xente sen recursos, non exento de polémica pola mala convicencia có vencindario.
Os veciños levan anos denunciando o que é un centro de menudeo de droga e onde se producen constantes incidentes de violencia como pelexas e ameazas con arma branca. Con todo, desde o Concello evitan apuntar hipóteses ou que hai intencionalidade neste feito como mantén a veciñanza e, din que, polo momento, “trátase dun accidente”.
“É verdade que son situacións nas que naturalmente nos pomos moi nerviosos, buscamos culpables e é humano que os familiares e os amigos e a xente máis próxima estea inquieta e pense ese tipo de cuestións, pero o mellor é deixar traballar aos profesionais”, subliñou a concelleira de Seguridade, Patricia Rodríguez.
De feito ese non sería o primeiro lume producido no edificio. Fai uns meses, un dos ocupantes deste edificio provocou de xeito intencionado outro lume na planta baixa, motivo polo que foi desaloxado tamén o edificio.
Á VENDA
Algunhas das vivendas do edificio estaban en venda nun coñecido portal inmobiliario. De feito, no anuncio xa se especifica que “o inmoble se transmite ocupado por terceiro sen título” e que estaba en “estado de ruína, non sendo posible a súa ocupación, nin o seu destino como vivenda ou local, debendo tomarse as precaucións que correspondan en caso de acceso ao mesmo”.
UN INMOBLE DOS ANOS 60 PENDENTE DE DESALOXO
O edificio estaba pendente de ser desaloxado para a realización de reformas menores, segundo informaron desde o goberno municipal, que sinalou que a propiedade do inmoble, a través dun administrador, comunicou hai unhas semanas ao Concello a súa intención de acudir á vía xudicial para “recuperar a posesión” do mesmo.
Así o explicou a concelleira de Urbanismo, María José Caride, que matizou que, con todo, non constaba que houbese danos estruturais importantes no edificio. Segundo explicou, o Concello tiña constancia dalgúns danos nunha fachada interior, pero os técnicos non puideron ratificalos porque non se lles permitiu o paso polos residentes.
Caride tamén indicou que o edificio que si ten requirimento municipal para facer obras é o número 4, onde se detectaron problemas de desconchados e de humidade na fachada que, en todo caso, non afectan á súa seguridade. Tras o incendio, engadiu, unha vez que culminen os traballos dos investigadores e autoríceo o xulgado de instrución, técnicos municipais accederán ao edificio sinistrado para valorar o seu estado e as súas condicións de habitabilidade.
A concelleira de Seguridade, Patricia Calviño, tamén explicou que, nese mesmo inmoble, houbo “varias intervencións” de efectivos de emerxencias e que, salvo unha delas, todas foron “falsas alarmas”. A edila sinalou que, o pasado mes de agosto, rexistrouse un incendio que afectou a un cadro eléctrico pero que os danos non se estenderon a outras zonas do edificio.
ATENDIDOS POR SERVIZOS SOCIAIS
Pola súa banda, a concelleira de Benestar Social, Yolanda Aguilar, confirmou que tanto os servizos sociais do Concello como da Xunta coñecen á familia dos falecidos, e que tiñan “historia aberta” en ambas as administracións. Ata o lugar do incendio desprazouse persoal deste departamento para atender aos desaloxados do inmoble (unhas 30 persoas) e cubrir as súas necesidades básicas nese momento.
Así mesmo, sinalou que 13 persoas foron recolocadas no albergue municipal (dúas delas tras recibir o alta do hospital) e que alí recibirán atención psicolóxica e psicosocial. O Concello tamén se fixo cargo das mascotas que vivían no inmoble, que foron trasladadas á Protectora Municipal.
OPERATIVO DE EXTINCIÓN
Calviño explicou que no operativo de extinción, participaron os dous ‘trens de primeira saída’ de ambos os parques municipais, formados por un sarxento, 4 bombeiros e un condutor. A maiores, mobilizouse o vehículo escaleira para rescate en altura cun bombeiro e un condutor, e a motobomba urbana do parque de Coruxo, que non tivo que intervir, aos que se sumaron o suboficial e o xefe de servizo.
Indicou que tamén foron mobilizados 12 efectivos de Policía Local para apoiar o labor de Policía Nacional, Urxencias Sanitarias e os propios bombeiros. Segundo relatou, os servizos de extinción tardaron apenas 7 minutos en chegar e en poucos minutos puideron sufocar as chamas, aínda que “o principal problema foi a toxicidade do fume”.
A sección sindical da CUT no servizo de bombeiros, denunciou que efectivos de extinción realizaron informes sobre os problemas que presentaba o inmoble nas anteriores intervencións, alertando de que había xente vivindo alí en malas condicións de habitabilidade e que as dependencias do edificio acumulaban aveños, “o que podería supor un problema en caso de incendio grave”.
LOITO OFICIAL
O alcalde da cidade, Abel Caballero, trasladou a “consternación” de Vigo polo ocorrido e agradeceu as mostras de apoio e de pésame recibidas (entre elas do presidente do Goberno, Pedro Sánchez; o presidente da Xunta, Alfonso Rueda; a portavoz nacional do BNG, Ana Pontón; ou o presidente do Parlamento galego, Miguel Ángel Santalices, entre outros).
Así mesmo, informou de que se decretan tres días de loito oficial, con bandeiras a media hasta, e suspendéronse todos os actos municipais (incluído o pleno extraordinario previsto para este mércores).
A Deputación de Pontevedra tamén decretou loito e suspendeu a súa axenda, á vez que trasladou que “comparte a dor de toda a familia e a cidadanía viguesa”. O presidente provincial, Luís López, expresou as condolencias de toda a Corporación así como o “agarimo” aos afectados e os seus achegados.
As mostras de condolencia repetíronse noutros lugares de Galicia, como no Parlamento autonómico, onde se gardou un minuto de silencio.
A Garda Civil, pola súa banda, confirmou a desconvocatoria dos actos previstos para este xoves, con motivo da festividade do Pilar, que ían ter lugar nas instalacións da Compañía Fiscal do Porto. Unicamente manterase a celebración de misa solemne na Concatedral de Vigo ás 12.00 horas.
