O Tribunal Supremo ditou sentenza tras estimar parcialmente o recurso da Fiscalía contra a resolución do TSXG sobre o ‘narcosubmarino’ apresado fronte ás costas de Aldán, en Cangas (Pontevedra) en 2019, e corrixiu en parte a decisión do alto tribunal galego, condenando aos dous implicados que foran absoltos.

Así, inicialmente a Audiencia Provincial de Pontevedra condenou ao sete acusados por estes feitos a penas de entre 7 e 11 anos de cárcere e multas millonarias polo transporte de máis de tres toneladas de cocaína nun semisumerxible que partiu de Brasil e que foi localizado á entrada da ría de Aldán a finais de novembro de 2019. Nesa causa foron procesados o tres tripulantes do ‘narcosubmarino’ (o vigués Agustín A.M., e os ecuatorianos Luís Tomás B.M. e Pedro Roberto D.M.); así como os seus colaboradores en terra (Enrique Carlos S.X., o seu fillo Iago S.P., Rodrigo H.M., e Iago R.R.).

As defensas presentaron recursos de apelación e o Tribunal Superior de Xustiza de Galicia ditou sentenza en novembro de 2022 absolvendo a Carlos Enrique (condenábao a unha pena menor, pero pola droga atopada no rexistro do seu domicilio, non polo alixo do semisumergible) e a Rodrigo, e rebaixando as penas a Iago S.P. (de 9 anos a 26 meses de prisión) e a Iago R.R. (de 7 anos a 18 meses de cárcere).

RECURSO DA FISCALÍA

Ante esta resolución, a Fiscalía interpuxo recurso de casación no Tribunal Supremo, alegando, entre outras cuestións, que o TSXG modificara os feitos probados rebaixando o delito de tráfico de drogas a “tentativa de participación” no caso de dous dos acusados, que se vulnerou o dereito á tutela xudicial efetiva ou que se habían cuestionado arbitrariamente feitos considerados probados pola Audiencia.

En resposta a este recurso, o Tribunal Supremo ditou unha nova sentenza tras estimar parcialmente as pretensións da Fiscalía. Así, na súa resolución do pasado 21 de setembro de 2023, o TS sinala que Iago S.P. e Iago R.R. foron “os máis activos dos colaboradores coñecidos” dos que dispuxo Agustín para introducir a droga en España, e ambos os acusados participaron na operación aínda que non fosen os destinatarios orixinais da cocaína.

Con respecto a Enrique Carlos e Rodrigo, apunta que ambos coñecían “detalles esenciais” do operativo de chegada do artefacto e levaron a cabo unha “colaboración necesaria e efectiva no desenvolvemento do plan criminal”.

Segundo expón o Tribunal Supremo, Rodrigo non só acudiu ao momento de encontro pactado nas costas de Aldán para entregar roupa e comida aos tripulantes, senón que fixo sinais coas luces do coche para axudalos a guiarse; mentres que Enrique Carlos aceptou levar a Rodrigo eses efectos, tal e como lle pediu o seu fillo, “con coñecemento do que facía”.

NOVAS PENAS

Por todo iso, a Supremo condena a Rodrigo H.M. como autor dun delito tentado de tráfico de drogas á pena de 1 ano e medio de cárcere e ao pago de dúas multas de 50 millóns de euros cada unha; e condena a Enrique Carlos S.J., como cómplice do anterior delito, á pena de 9 meses de prisión e dúas multas de 25 millóns de euros.

No caso de Iago R.R. e Iago S.P., ademais das penas fixadas polo Tribunal Superior de Xustiza de Galicia, imponlles a cada un unha nova pena de multa de 50 millóns (despois de que a Fiscalía alegase un erro na sentenza de instancia, onde só figuran unha multa a cada un).