Axentes da Policía Local de Vigo detiveron a tres mulleres, de idades comprendidas entre 22 e 58 anos, como presuntas autoras dun delito de roubo con forza cometido nun bar da cidade.
Os feitos ocorreron a última hora da tarde do pasado sábado, cando unha testemuña se atopaba nas inmediacións do bar, xa pechado, esperando á propietaria do mesmo. A testemuña observou que unha muller se achegaba ao establecemento e, desde dentro, outras dúas mulleres lle franqueaban o paso.
A testemuña avisou á Policía e á dona do bar, que se presentou na zona. Ambos interceptaron ás tres presuntas ladroas cando saían do bar minutos despois.
Cando chegaron os axentes e identificaron ás sospeitosas, comprobaron que unha delas posuía un xogo de chaves do local, porque rexentara o negocio tempo atrás, polo que a porta do bar non estaba forzada. Con todo, si que foran apalancadas e danadas unha máquina de tabaco e un ‘comecartos’.
Ao revisar as mochilas que levaban as mulleres, os policías atoparon ferramentas como martelos, patas de cabra e outros efectos. Por estes feitos, e despois de que a anterior responsable do local recoñecese que entraran e forzaran as máquinas, os axentes procederon á detención das tres mulleres.
