A Universidade de Vigo entregou onte os seus Premios Alumni UVigo cos que busca impulsar e recoñecer a excelencia de antigos alumnos e alumnas da súa institución. Nesta edición o premio á Traxectoria Profesional recaeu en Patricia García, presidenta institucional de Femxa, entidade con máis de 20 anos de experiencia, especializada en consultoría e formación para o emprego.

A directiva foi recoñecida pola súa traxectoria empresarial de referencia para outros profesionais, pero tamén por ser exemplo de talento feminino, servindo de inspiración para as novas xeracións de mulleres. Entre os éxitos profesionais destacados na súa candidatura está o ser a primeira muller en presidir o Círculo de Empresarios de Galicia durante tres anos, así como presidir a Asociación de novos empresarios e empresarias, onde Patricia segue colaborando activamente prestando asesoramento e apoio a novos emprendedores e emprendedoras.

QUEN É PATRICIA GARCÍA GONZÁLEZ?

Patricia García González é licenciada en Filoloxía Inglesa na Universidade de Vigo e Experta en Desenvolvemento de Metodoloxías en Formación e-learning pola UNED. Na Universidade soñaba con ser profesional pero pronto descubriu a súa inquietude polo mundo empresarial.

Por iso, xunto aos seus socios, creou Femxa hai máis de 20 anos. Actualmente a compañía, que é referente nacional no seu sector, está composta por 8 entidades e conta cun persoal de máis de 400 persoas.

“Foi un comezo moi duro compaxinar o lanzamento empresarial con ser nai, xa que tiven á miña primeira filla con 24 anos”. Actualmente, Patricia é nai de tres fillos e ocupa o cargo de Presidenta Institucional de Femxa. Ademais adica parte do seu tempo a apoiar a outros emprendedores, colaborando activamente con diferentes asociacións como AJEGalicia.