Unha muller morreu na tarde deste martes en Vigo, na Estrada do Freixo, tras ser atropelada por un autobús urbano do que acababa de baixarse.

Segundo informa o 112 Galicia, ocorreu pasados uns minutos das 17,00 nun lugar próximo ao cemiterio de Valadares. O alertante foi o propio condutor do autocar para indicar que atropelara a esta persoa que permanecía atrapada debaixo do vehículo.

Seguidamente, a central de emerxencias puxo os feitos en coñecemento de Urxencias Sanitarias de Galicia-061, dos bombeiros de Vigo, da Policía Local e da Garda Civil de Tráfico.

Os bombeiros, cando chegaron ao lugar, indicaban que a muller atropelada estaba liberada e accesible, pero os servizos médicos non puideron facer nada por salvarlle a vida.