Docentes do IES Audiovisual de Vigo rexeitaron este martes a súa conversión nun Centro Integrado de Formación Profesional (CIFP) ao entender que isto suporía “un detrimento na calidade do ensino e das prácticas”.
Nun comunicado, o claustro informou de que, tras decatarse da decisión “unilateral” da Consellería de Cultura, Educación, FP e Universidades de converter o instituto nun CIFP, a dirección convocou unha reunión de todo o profesorado para abordar o tema xa que implica, ao seu xuízo, “cambiar radicalmente o traballo formativo do alumnado dos ciclos que alí se imparten”.
“A conversión nun CIFP supón un detrimento na calidade do ensino e das prácticas profesionalizantes que con notable éxito leva realizando desde hai máis de 10 anos, con catro premios nacionais que os avalan e con felicitacións por parte do tecido empresarial do sur de Galicia e da propia Consellería”, reivindicaron os profesores.
Así, aseguraron estar nunha situación de “indefensión” ante as decisións “arbitrarias” da Xunta. “Proba diso é a concesión dun ciclo a distancia, trátase de Realización de Audiovisuais, que a directiva non pediu e hoxe nun correo enviado polo seu director aos profesores afirma que é un erro”, argumentaron.
“Desde o IES Audiovisual de Vigo sempre se transmitiu á Administración educativa, con argumentos sólidos, todas as desvantaxes que esta transformación levaría consigo con respecto á calidade da formación que se oferta nesta familia profesional en concreto”, reivindicaron.
Por todo iso, lamentaron a decisión da Consellería de comunicar esta decisión o mesmo día que se fixo pública nos medios de comunicación, pondo o foco en que algunhas actividades que agora se realizan non poderán facerse, como curtametraxes ou espectáculos, porque levan a cabo fóra dos espazos do centro e en horario non lectivo.
