O incendio dun camión en Redondela (Pontevedra) obrigou a cortar momentaneamente o tráfico na N-550, debido ao risco que supuña a presenza dalgunhas bombonas de butano, aínda que non se rexistraron feridos.

Segundo informou o CIAE 112-Galicia, os feitos ocorreron pouco despois das 16,00 horas, cando un particular chamou a Emerxencias para informar de que un camión que transportaba chatarra estaba a arder pola súa banda traseira na N-550, á altura do punto quilométrico 138.

Desde o Centro Integrado de Atención ás Emerxencias (CIAE) púxose a incidencia en coñecemento dos bombeiros do Morrazo e do Porriño, do GES de Mos, da Garda Civil de Tráfico, da Policía Nacional e da Policía Local de Redondela. No operativo tamén participaron membros de Protección Civil de Redondela, e o servizo de mantemento da estrada.

Unha vez no lugar, os efectivos alertaron de que o camión transportaba algunhas bombonas de butano, polo que se interrompeu a circulación neste punto da estrada mentres duraron as tarefas de extinción.