Un erro da empresa contratada para facer o buzoneo de papeletas electorais do PP en Redondela (Pontevedra), provocou que os veciños de Chapela, a principal parroquia do municipio, recibisen no sobre de propaganda electoral do partido, unha papeleta da candidatura do PP de Vilagarcía de Arousa.

Así, os veciños deste núcleo redondelano recibiron este martes nos seus domicilios un sobre cunha carta asinada polo candidato á Alcaldía, Javier Bas, pedindo o seu voto, acompañada por unha papeleta correspondente á candidatura do mesmo partido en Vilagarcía, encabezada por Ana María Granja.

O PP de Redondela enviou un comunicado aos medios para informar o erro, que atribúe á empresa de repartición de propaganda, e fixo un chamamento aos veciños que decidiron o seu voto para os ‘populares’ para que “comproben que, efectivamente, é o nome de Javier Bas o que aparece como número 1”.

Os responsables locais do partido lamentaron o erro, “alleo totalmente” ao PP e á candidatura, e trasladaron as súas desculpas. Así mesmo, sinalaron que tentarán, “se aínda hai marxe para iso”, que chegue aos domicilios dos veciños a papeleta “correcta”.