Axentes da Policía Local de Vigo detiveron a un veciño da cidade, D.V.C., de 46 anos de idade, como presunto autor do roubo dun coche, e que foi sorprendido circulando con el pola propia dona do vehículo.
Segundo informaron fontes policiais, os feitos ocorreron na tarde do pasado luns, cando unha muller requiriu a unha patrulla que circulaba pola rúa Aragón. A requirente explicou aos axentes que, momentos antes, acababa de ver circulando por esa rúa a alguén no vehículo que lle roubaron esa mesma mañá.
A Policía Local deu aviso a outras patrullas e unha dotación localizou o turismo circulando pola confluencia das rúas Cantabria e Vista ao Mar. O condutor ía a tal velocidade que tivo que realizar unha manobra evasiva para non chocar con outro coche.
Os axentes activaron os dispositivos acústicos e lumínicos pero o sospeitoso iniciou a fuxida a gran velocidade. Durante a persecución, o sospeitoso sufriu un accidente, ao chocar contra un bordo nunha pendente inclinada, no cruzamento entre a rúa Cantabria e a Travesía de Vigo.
Os policías saíron do coche patrulla e dirixíronse ao outro vehículo para inteceptar ao condutor, que tentou fuxir á carreira. Finalmente, e a pesar de mostrar gran resistencia, foi reducido e detido como presunto autor do roubo do coche.
