A Policía Nacional investiga unha empresa de Vigo, adicada á asistencia sociosanitaria a domicilio, por suposta explotación laboral a máis dunha trintena de traballadores estranxeiros que na súa maioría atopábase en situación irregular en España.

Tal como informou o corpo de seguridade, a investigación iniciouse tras a denuncia dunha cidadá, que alertaba sobre as condicións laborais nas que traballara. A vítima relataba unhas condicións abusivas nas que traballaba coidando a persoas maiores dependentes nos seus fogares, traballando todo o día, os sete días da semana, por un salario “ínfimo”, sen alta na Seguridade Social. A partir de aí, puidéronse detectar máis persoas afectadas por esta situación cun perfíl similar.

“A investigación pon en evidencia a precaria situación dos traballadores e as condicións de traballo. Tratándose dunha empresa dedicada a prestar servizos sociosanitarios a persoas dependentes nos seus domicilios, non facilitaba ningún tipo de medida de protección para os seus traballadores, ademais de ocupalos sen os coñecementos profesionais nin formación necesaria para levar a cabo as súas tarefas, pondo en risco tanto a traballadores como a pacientes vulnerables”, engadiu a Policía.

Coa colaboración de Inspección Provincial de Traballo, realizáronse diversas actuacións en domicilios, co fin de comprobar a ocupación e o traballo do persoal da empresa investigada, dando como resultando a detección de que máis dunha trintena de persoas estiveron traballando para esta compañía en condicións de precariedade laboral e sen contrato.

Por todo iso, á persoa que dirixe a empresa impútanselle varios delitos contra os dereitos dos traballadores, intrusismo e contra a Facenda e Seguridade Social.