Dous homes foron detidos en Vigo nas últimas horas pola súa presunta vinculación cunha plantación de marihuana localizada este xoves nunha vivenda na que se declarou un incendio.

Á primeira hora deste xoves saltou a alarma por un incendio rexistrado na planta baixa dun inmoble de dúas alturas, na rúa Castela, perpendicular na rúa Piñeiro. Cando os bombeiros chegaron, non había persoas no interior da vivenda.

As chamas calcinaron por completo unha habitación e o fume afectou a toda a vivenda da planta baixa, así como ao chan do primeiro piso, onde hai outra vivenda independente.

Fontes policiais confirmaron que no inmoble había unha habitación preparada para o cultivo, con varios exemplares de plantas de marihuana. Na xornada deste venres, a Policía e a comisión xudicial procederon ao rexistro da vivenda e á incautación da marihuana e outros materiais.