O goberno municipal de Vigo criticou este mércores a convocatoria que o presidente da Xunta, Alfonso Rueda, enviou ao alcalde da cidade, Abel Caballero, para manter unha reunión o próximo 3 de outubro, ao considerar que se “impón” a presenza da delegada territorial, Marta Fernández-Tapias, porque Rueda pretende conseguir “unha foto co alcalde de Vigo, do presidente da Xunta e da candidata do PP á alcaldía”.
Así o trasladou o portavoz do goberno local, o concelleiro socialista Carlos López Font, quen tachou de “escándalo político” a convocatoria desa reunión por “impor” a participación da delegada.
Ao seu xuízo, esas reunións “teñen que ter carácter bilateral, como sempre o tiveron” e a presenza de Fernández-Tapias é “antidemocrática” (todas as reunións convocadas por Rueda cos sete alcaldes e alcaldesas das principais cidades contan coa presenza dos correspondentes delegados territoriais). “O único que pretende Rueda é presentar oficialmente á candidata do PP á alcaldía de Vigo (…), se xa eran incompatibles os cargos de delegada e candidata, hoxe sono máis”, proclamou.
López Font denunciou o uso “partidista” desa reunión por parte do presidente da Xunta, do que asegurou que “quere facerse unha foto co alcalde” da cidade. “É verdade que todo o mundo quere facerse fotos co alcalde, pero nunca neste contexto de utilización partidista”, matizou.
“Será o alcalde de Vigo o que verá se fai esa foto”, afirmou o portavoz do goberno municipal, quen preguntou a Rueda “que lle parecería se o presidente do Goberno o convocase a unha reunión acompañado polo candidato socialista á Xunta, e na Delegación do Goberno, non na Moncloa”.
CONSULTAR A AXENDA
Pola súa banda, o alcalde de Vigo, Abel Caballero, preguntado polos medios sobre a convocatoria de reunión, apuntou que terá que consultar a súa “axenda” deses días, porque precisamente nesas datas se celebra a feira Conxemar (está fixada para o 4, 5 e 6 de outubro).
“Teño que ver a axenda dese día (…), cando a vexa contestarei”, afirmou o rexedor que, no entanto, confirmou que este mércores trasladou por carta a Rueda a súa petición de que a Xunta subvencione en 27 céntimos o billete de bus urbano, unha demanda que se suma a todas as que Caballero xa trasladou por carta ao presidente galego cando asumiu o cargo a primavera pasada.
