Diferentes sindicatos e asociacións pediron aos vigueses que este próximo mércores, día 23 de marzo, saian á rúa e alcen a voz en protesta pola suba xeneralizada dos prezos.
Nunha rolda de prensa conxunta, representantes de Comisións Obreiras (CC.OO), UXT, Unión de Profesionais e Traballadores Autónomos (UPTA), Unión de Consumidores de Galicia e a Federación de Asociacións de Veciños Eduardo Chao de Vigo solicitaron á cidadanía que asista á manifestación convocada a nivel nacional e que en Vigo se celebrará o mércores a partir das 19,30 horas, con saída de Vía Norte e con final na Alameda.
Neste sentido, a secretaria xeral de CC.OO. en Vigo, Montserrat Carreira, lamentou a situación de inflación que vive España na actualidade pola alza dos prezos da enerxía. Un contexto que “se agravou” por mor da guerra de Ucraína.
Por iso, pediu ao Goberno que se conteñan os prezos, que se protexa o emprego e que se free a “deterioración” das condicións de vida dos cidadáns. Así, subliñou a necesidade de saír á rúa a manifestarse o vindeiro mércores porque o xoves e o venres hai reunión do Consello Europeo, onde se van decidir que políticas levar a cabo.
Na mesma liña falou Ernesto Fontanes, secretario xeral de UXT Vigo, quen explicou que a crise de 2008 deixou en España “un rastro de precariedade” e de case 10 millóns de persoas en situación de “vulnerabilidade”.
Neste sentido, insistiu no “efecto dominó” que provoca a suba do prezo da luz e dos carburantes, que á súa vez elevan os prezos de moitos produtos e todo isto acaba repercutindo no peto dos que menos teñen.
Para el, as medidas que aínda non puxo en marcha o Goberno xa chegan “tarde”, polo que anima aos cidadáns de Vigo a que se manifesten para pór “coto” a esta situación.
Tamén o secretario xeral de UPTA Galicia, Jesús Diéguez, considera que as medidas chegan “tarde” e criticou que na actualidade a factura de luz para algúns establecementos comerciais xa supón case o 35% dos seus custos. “É insustentable”, engadiu.
O secretario xeral da Unión de Consumidores de Galicia, Miguel López, puxo o foco en que na actualidade a tarifa eléctrica regulada, que a priori tiña un carácter social para garantir un prezo razoable da luz aos cidadáns, agora custa entre 5 ou 6 veces máis que “calquera oferta” do mercado libre.
“Chegamos moi tarde”, coincidiu co resto dos presentes na rolda de prensa, asegurando que os teléfonos da súa asociación están “colapsados” de chamadas de cidadáns asegurando que as súas facturas da luz multiplicáronse ata por dez.
Tamén Óscar Álvarez, da Federación de Asociacións de Veciños Eduardo Chao de Vigo apoiou a manifestación e pediu ao Goberno que convoque un consello de ministros “urxente” para baixar os impostos da tarifa da luz e dos carburantes.
A mobilización para esixir ao Executivo de Pedro Sánchez e á Unión Europea que actúen para conter a escalada “disparatada” dos prezos sairá de Vía Norte de Vigo ás 19,30 horas o vindeiro mércores, 23 de marzo.
Sindicatos e asociacións convocaron manifestacións por toda Galicia e España. Así, en Galicia haberá tamén marchas en Pontevedra e A Coruña, mentres que se levarán a cabo concentracións en diferentes cidades como Santiago, Lugo, Ourense, Viveiro ou Vilagarcía.
