Dúas persoas resultaron feridas en Vigo despois de que o coche no que viaxaban marchara da vía e chocara contra o muro dunha casa en Candeán. Ocorreu sobre as 21,00 horas da noite do sábado. Entón, os bombeiros da cidade desprazáronse ata a rúa de Rabadeira tras ser alertados por un coche accidentado e cunha muller atrapada no seu interior.

O 112 Galicia tivo constancia do suceso a través dunha persoa particular e do persoal de Urxencias Sanitarias de Galicia-061. Seguidamente, os xestores do 112 puxeron os feitos en coñecemento dos Bombeiros da cidade, da Policía Local e de Protección Civil da cidade. Unha vez no punto, os bombeiros confirmaron que foi preciso excarcerar á muller atrapada. Ademais, os servizos sanitarios tiveron que trasladar a dúas persoas.