O alcalde de Vigo, Abel Caballero, afirmou este luns que a reclamación da empresa concesionaria do bus urbano, Vitrasa, que pide ser compensada en máis de 15 millóns de euros polas perdas derivadas da pandemia, “é improcedente”, segundo sinalan os propios técnicos da asesoría xurídica do Concello.

Cuestionado acerca desta reclamación, o alcalde limitouse a lembrar que son os propios técnicos municipais os que propuxeron desestimar as reclamacións da empresa. “Non é unha opinión, non o digo eu. Esta é unha cuestión suxeita a normas, e falan os funcionarios”, explicou.

A empresa concesionaria do bus urbano de Vigo, Vitrasa, cobrou por parte do Concello, como medida para recuperar o equilibrio económico da concesión, unha primeira axuda de 2,2 millóns de euros. Posteriormente, e con cargo á subvención aprobada polo Ministerio de Transportes, Mobilidade e Axenda Urbana (para compensar as perdas nas concesións de transporte público), outros 3,5 millóns de euros.

Con todo, Vitrasa segue reclamando máis diñeiro para compensar as perdas sufridas desde marzo de 2020, e dirixiuse ao Concello para pedir unha compensación de 9,9 millóns polo período de marzo a decembro do ano pasado; e outros 5,6 millóns correspondentes ás perdas de xaneiro a agosto de 2021.

A empresa presentou varios recursos de reposición que, tras o correspondente informe xurídico, a Xunta de Goberno local desestimou.

Dáse a circunstancia de que, en xuño de 2020, en plena pandemia, a Xunta de Goberno Local acordou prorrogar a concesión a Vitrasa por outros 5 anos, e iso a pesar dos anuncios de que se faría unha nova licitación e un novo concurso para adxudicar este servizo. Nese momento, o propio alcalde xustificou a prórroga alegando que a crises sanitaria facía imposibles os cálculos económicos do prego de concesión.

CRÍTICAS DE MAREA DE VIGO

Ante esta situación, o portavoz de Marea de Vigo, Rubén Pérez, lamentou que a prórroga da concesión resultou “unha absoluta inutilidade”, porque non evitou que a empresa faga esa reclamación patrimonial e, ademais, mantén vixente o sistema tarifario.

O portavoz deste grupo esixiu unha explicación ao goberno local, xa que “dixeron que a última ampliación de concesión, de cinco anos, ía permitir amortizar parte desa reclamación patrimonial”. “O que realmente temos son cinco anos máis de concesión co mesmo sistema tarifario, que fai que teñamos que estar sempre compensando a Vitrasa por non alcanzar os 20 millóns de pasaxeiros anuais”, denunciou.

Finalmente, criticou a “falta absoluta de control” sobre esta concesión e a ausencia de vontade “para ter un transporte público digno, con abonos mensuais ou anuais, como teñen a maior parte das grandes cidades”, á vez que volveu reclamar a remunicipalización do servizo.